It good!  It good!  It good!…. It good!   It good!  It good! Ah did tell dem so… but nah, dey wouldn’t   listen.. yuh see wha’ happen now…?   De PNM storm back and take way one setta local  corporations by almost a clean sweep…. Boy, why people doh hire me as campaign manager or somet’ing…?   I always have meh ears close  to de groun’, so I know de scores…. an’ ah does work FAIRLY  cheap….. how many times ah warn dem ‘bout some of de t’ings dey doin’ an’ de behaviour ah some of dem Ministers…. ent ah talk about Gunraj “the Jooker” Singh, ah fed up mention Assam (Ass-I-am), de (mis) education  Minister… ah tell  dem ‘bout wastin’ money on ah beauty show, the NP scandal, how $30M worth ah rice gone missin’ on de high seas (dem fish mus’ be eatin’ pelau till dey sick…)…look, an’ ah now start tuh talk… but dey feel dey go jus’ ride over everyt’ing wit’ ah setta stupid talk an’ advertisement….

Well boy, if yuh see de UNC camPAIN (no, ah doh mean campaign…dah camp was in plenty discomfort) headquarters… like ah cemetry… dem fellas sufferin’ from de “bull- pistle effect”… dey know dey get hit but dey eh know from who, or where de lash come from…. if dey did read TNN, none ah dis woulda happen…. of course if yuh see Papatrick on de odder side.. like ah rooster in ah hen coop… but ah want tuh tell him ….. “better cock dan dat crow an’ end up in  pot”.. but   ah doh expeck him tuh take notice…. instead ah coastin’ ah humble head an’ sayin’…“well, we thank de people for votin’ for we, an’ I humbly accept  de result, an’ resolve tuh do meh bes’ tuh fulfill the confidence placed in de party…”   (look nah, ah is ah boss…alyuh eh make out dem lyrics?! Cobra for PM, boy!  Ah have it dong cold !)  he open he mout, an’ is like ah cesspit overflow…. “ Dis is ah act of God…. de voice of de people is de voice of God”.   

God?   God?  God?!   How God reach in dat…. wen de people tellin’ yuh tuh step dong for de las’ 3 years, dat wasn’t de voice of God den….EH?!  Oh, “ how all dis ole  talk dat PNM cyah win wit’ he as leader is jus’ dat…ole talk”.   Mr. Maddening, de PNM gain not because of you, but IN SPITE of you!… De UNC jus’ self destruct…. you had nothin’ to do wit’ dat!…..   Yuh know de man like ah comic book….. yuh cyah believe somebody like he exist….. anyway de circus in town, so he bong tuh get ah job…..

Alyuh ever realise ah politician never lose ah election… Manday say he get more votes dan de PNM, so it show de party spreading de base (not really, is jus’ dat in he areas, he win good, so de final amount ah votes make him look good…) an’ dat is ah good sign… short memory BAS…. in 1981 de ONR (Oh No…Run!) win more votes dan Bas party, an’ eh get one seat, an’ Bas get 12…. he eh say de ONR had ah broad support base…. noooooo…. an’ wey de ONR now….? 

Remember Papatrick did say he didn’t lose de las’ general election, was ah “tie”… well dat tie mus’ be ‘round he neck, because he is Leader of OPPPOSITION… accept yuh lorses an’ come again, nah… an’ tuh cap it off Paptrick callin’ for ah general election now, since “de people” have spoken… wha’ happen tuh dat fella boy, he t’ink election is ah lime, yuh does jus’ call one anytime…?   But ah believe dey eh realise dat dem is ah Minority government… only 39% of de people vote…. yeah… after all dat talk, 60% of de people eh take dem on…. so ah believe is time ah throw meh hat in de ring… if de priest could play, who is me…?  Ah t’inkin’ ‘bout bringin’ out meh own party…. complete wit’ de DJ,.. but ah still lookin’ for ah slogan… ah done have meh symbol, two fangs drippin’ venom.. wit’ Manday an’ Papatrick runnin’ from meh… vote de Cobra to get rid of Political  Pests!    Aaiieeeee!

ROARIN' ON.....

Ah piece ah sad news… de Roarin’ Lion leave we earlier dis week.. he was 91 years ole… de man play ah good innings boy… since from de twenties dat fella singin’ calypso…. now of course, everybody bawlin’ it have nobody like he again, an’ dat is de usual talk, now dat  he cyah hear it ….

De man had one collection ah ol’ records, an’ he offer tuh sell de collectin tuh government, but dey say he was askin’ too much… too much for ah  livin’ piece ah de history of de people.. Princess Di  hat, an’ Elton John underwear go sell for thousands of pounds an’ you tellin’ me is too much tuh pay for ah vintage collection of music...? 

An’ de man had “encyclopaedic” (or CD ROM) knowledge of de art form… yuh t’ink dey ever make him sit dong an’ get de stories from him for posterity… nah , we eh have time fuh dat.. we too busy listenin’ tuh other people music an’ history… dat fella take he money an’ went abroad tuh record he music in de 30’s, take all de rejection of de society, until calypso become acceptable.. an’ still put out some classics… an’ if yuh see de man dress… he come from de bottom… but he had self respeck…always in he nice suit an’ cane…. if yuh pass close an’ brush him, yuh go  get cut .....fus de man sharp…! 

Not even ah little monument tuh all dem ole pioneers, ask any chile under 11 yrs if dey know Michael Jackson, an’ den ask dem if dey know any songs by the Roarin’ Lion, it go be embarassin’…. meh eh know why we eh take we national flag an’ use it as head cloth… ah eh sure if we have identity again….. alyuh remember dem songs Lion give we…

Netty, Netty…. Gimme de t’ing dat yuh got in yuh belly…

Or de Road March,

All day, All night, Miss Mary Ann,
Down by de seaside, she shiftin’ sand…

An’  when he sing about de ole time days,

Yuh use tuh get ah ha’penny rice, ha’penny black eye peas,
Ha’penny oil, ha’penny bread an’cheese,
An’ if yh had bread, an’ couldn’t afford cheese,
Yuh beg for ah piece ah saltfish please

But one ah meh favourites was dat J’ouvert  morning tale of Carnival long ago, complete wit’ patois..

Jouvert, barre yeau , 
par levez lamain asseux yeaux..
An’ a ping a ling a ling
She pac, she pac pac 
De bottle an’ spoon, an’ de tamboo bamboo.
Jouverrrrrt, barre yeau , 
par levez lamain asseux yeaux